有綱友出左影評喇.........話好鬼好睇.....尤其70年代果D..好有共嗚...P妹....妳咪70年代囉


而呢套戲絕對絕對值得親身入場觀看
而且最好小說甚至乎連【那些年】個MV都唔好睇
腦海一片空白咁入場
先感受到套戲既真正威力
所以奉勸各位睇左戲既先好睇以下內容

我睇優先場，一早收晒風而入場
知道個劇本咁能普通但都係台灣大收3.8億
坦白講，先入為主抱住唔順超、搵錯處既心態去睇
點知最後果場我第一個帶頭拍手掌
真係遇到高手，想打都冇得打
【那些年，我們一起追的女孩】絕對係近期佳作

首先俾觀眾十萬個放心
套戲雖然改篇自同名小說
但拍得乾淨俐落，唔駛擔心，獨立睇冇包袱反而仲好效果
而且坦白講，呢套戲既成功，唔係因為「九把刀」既名氣
相反係因為九把刀能夠拍得出呢套作品，佢先所以咁紅
套戲本身係值得咁受歡迎

【那些年，我們一起追的女孩】係典型青春愛情劇
但描述既係八十前的愛情故事
1994年高中，1997年入U
沒有internet、沒有facebook、沒有智能手機的年代
對於而家30歲或以上既中男中女絕對係入晒
加上套戲強調既係「那些年，你錯過了什麼？」
遺憾人人都有，年長既更加多，更加感同身受
至於八十後、九十後
又會恍然大悟以前既人係冇internet時點樣溝女點樣表白
而且套戲喚醒左新一代久違了既「純愛」價值
拍法清新爽快，唔老土、唔說教、唔煩唔悶
有笑位、又有感動位
學生固然會睇、畢左業既又想尋回初戀既感覺
基本上大小通吃，所以爆紅！

套戲成功之道有好多，第一嬴係：集體回憶
扯旗、睇AV、打手槍、玩粉擦、射橡筋、Happy Corner、龍珠、井上雄彥、櫻木頭
上堂傳紙仔鋤D、駁老師咀、帶動同學集體反抗老師、罰企、無影?、鴨仔跳
會考後要同死黨分道揚鑣、排排坐講理想講志願
入U後宿舍生活、Ocamp營火舞、排隊打電話
如果台灣人看，場景也充滿回憶
成班死黨坐係球場看台一齊見到班花經過
一齊鍾意班花、各施其技追女仔或許你未試過
但男仔代女仔受罰、男仔為女仔發奮
唔想心儀既人差過自己、唔想自己差過心儀既人
唔敢表白玩暗戀、唔敢拖手玩純愛
情人唔係戀人、鍾意果個唔係結婚果個
做唔到戀人做到好朋友
以上情節你同我或多或少經歷過
有回憶，所以有共鳴；有共鳴，自然有感受
入晒！

第二嬴係：平凡平淡
角色設定係16歲普通學生
唔係尖子、唔係校隊成員、唔係有錢仔、又唔係古惑仔
一群普通家庭既高中生的成長故事
夠平凡、夠大眾、所以夠入屋！
情節亦非常平淡
冇強姦、冇絕症、冇生離死別
冇催淚、冇誇張、冇超現實情節
用生活化題材扭橋
原子筆篤背脊、髮型打賭、寫天燈
劇本刻意冇塑造大反派
角色有對立但又冇衝突
情節有眼淚但又冇傷害
拍得淡淡然、舒舒服服
夠真實，所以易投入；易投入，自然地易感染
又入晒！

第三嬴係：樂而不淫
活用青春期男生笑點，玩扯旗、玩AV、玩打手槍
玩遺傳、玩英文、爛魔術、最後仲玩埋男人打車輪
笑位樂而不淫而且相當密集，完全擺脫一般愛情劇既沉重
呢個亦係套戲一定要入場睇先得既原因
由「勃起」個名開始笑，差唔多每隔5分鐘就有一個笑位
全場爆笑果隻感覺第日睇碟睇唔返

第四嬴係：笑中有淚，淚中又有笑
校園青春劇要拍得抵死到肉，唔可以太悶太正經
但愛情劇要拍得感動，又唔可以拍得唔認真
九把刀就係拿掐得非常準確，取得非常成功既平衡
整套戲氣氛輕鬆笑位不斷，但劇情推進平實
冇刻意既催淚情節卻又相當感動
但往往感動位時又精心加入適量既笑位
表白果場除衫俾女主角喊笑左
地震後古董手機高舉大晒冷又笑左
結尾果場車輪更加係神來之筆全場爆笑
呢場車輪絕對令人聯想起【大丈夫】
而且大家都係tack shot，一個round track一個side track
不過【大丈夫】明顯純為爆笑
【那些年】卻笑中有淚，交代晒兩人既心情
起承轉合，補回錯過了十年的初吻
論輩份九把刀點都低過彭浩翔
不過論才華，高低立見
(p.s.唔係指彭浩翔低，只係九把刀太高)

第五嬴係：選角出色
起用新面孔新演員有新鮮感要讚
自信有好劇本而唔駛用卡士演員更讚
女主角陳妍希樣子清純秀麗
男主角有穩穩陣陣既棒棒堂敖犬唔用
夠薑起用新人柯震東，結果眼光獨到一戲爆紅
柯震東成功演出柯景騰的深情和年少輕狂
加插彎彎真人真演更是一絕

電影好看
大家更加唔好忽略首主題曲【那些年】
由九把刀親自填詞
把整套戲既精髓濃縮晒入短短百幾字歌詞度
真係高手！
個原裝【那些年】MV亦是電影的精華
Youtube有大家唔好錯過

香港人看，感受一定唔夠台灣人深
畢竟我們沒有地震、沒有天燈
【那些年，我們一起追的女孩】
始終都係屬於台灣人的電影，台灣人的驕傲

各位葉念琛既fans
唔該虛心睇下呢套戲
睇下真正賣座既愛情片係點
唔駛sell波
亦唔駛爾虞我詐

套戲真係無得彈
如果夾硬搵野打
我只能打兩個points
1.打手槍的Miss可唔可以搵件堅索
2.九把刀大人，唔好成日話套戲係你自傳
我信你有咁深情，都唔信你年少時有柯震東咁型

jenny午安:smile_o15:

好看咩

午安

jenny妳睇左???

女太細啦沒看電影

唔係好明妳意思......妳千金太細???不方便一齊去看電影????

辛苦了..公主:smile_o06:
母后現在去買餸,妳們想吃什麼??:smile_o11:

係呀我有個女架,她一去黑的地方就大叫

唔同妳個女去咪得囉