Part 7 - 恨錯難返
[回憶]
同Doris認識,係由兼職開始
當時我晚上返call台,朝早放工就去做四個鐘頭兼職文員
公司雖然有好多女同事,但大部份都係結左婚既師奶
唯得Doris一個係後生女,好自然咁成日留意佢
Doris亦感覺到我時常望佢,但礙於平時的工作繁忙
故平時只係閒聊兩句就各自工作
有一日,公司經理突然叫我入房,說公司生意唔好
將會遣散所有兼職,並以時薪制重新聘請
但我當時卻選擇了離開
Doris : 你唔做啦?
我 : 係呀,都做左半年啦,係時候要休息下,只係返一份工就算了
Doris : 其他兼職都繼續留低,我仲以為你會繼續做落去
其實當時我覺得,如果再留係公司,我就無時間追Doris
Doris亦未必肯接受到辦公室內的戀情
係我離開後一個月,就終於成功追求到Doris
[回憶完]
收到Doris既短訊後,我即時打返電話俾Doris
但電話唔通,回覆訊號俾佢問什麼事
但通通都沒有回應
我唯有即時趕去醫院睇下
當升降機門打開,係我眼前出現既水牌 "婦產科"
行到去床邊,我差D認唔出眼前既人,就係我認識既Doris
Doris正大肚陀住BB,準備要生產
身體亦因為懷孕關係水腫左唔少,同我以前所見既窈窕身材相差好遠
Doris : 黎左啦?
我 : 妳無事嗎? (係這刻,我真係唔知道有乜野可以講)
我 : 點解....
Doris : 有乜野都等我生左先講啦 (Doris意識到我想問乜野,即時截住左我既說話)
Doris : 聽日就係預產期,但好似仲未有跡象生得
此時有兩個中年男女入來探Doris.是Doris的父母
Doris好簡單咁介紹我之後,佢地既反應出乎地正常,
無因為我搞大左Doris個肚而發脾氣 (係這刻,其實我都唔知道Doris個肚係唔係我經手既)
只係話我終於返來啦.原來Doris係發現自己有左BB時
同父母講我去左外地公幹,要遲D先返到來
係這刻身邊出現好多疑問
到底我同Doris分手這九個月發生左乜野事?
點解佢父母出奇地平淡?
等到下午,Doris開始穿羊水,但醫生話穿左羊水都無咁快可以生得
痛左12個鐘,Doris才被推入產房
本來我可以陪住Doris生產,但Doris就拒絕左,唔肯俾我入去
清晨五點,BB終於出世
護士同我講 : 恭喜哂,係個女孩子,母女平安
新生命既降臨,本應是喜事,但我宜家應該值得高興嗎?
Doris : 你都返去休息下啦,你接近24個鐘無訓覺啦
我 : 咁我下午返黎睇妳啦
返到屋企,都差不多朝早九點,
雖然已超過24小時無訓覺,但此刻我根本訓唔著,
到底點同屋企人和Suki講好?
雖然難開口,但事情始終都要講清楚,媽媽聽到這消息後
即刻鬧我亂搞男女關係,搞出個大頭佛,
雖然口裡是鬧,但始終是自己既孫女,要我即刻同佢去醫院探Doris同個孫女
但點同Suki解釋好?係我未想到點講時,電話已響起
Suki : 你無事嗎?你尋晚請病假,宜家好番D未呀?
我 : 好返D啦,我無事架啦
Suki : 知道你病左,所以我都無打俾你,等你休息多D,你無事就好啦,我開工啦
我始終無勇氣同Suki講清楚件事
過左兩日,Doris就出院返屋企休養,我陪佢返屋企時,佢一句說話都無講過,直至入屋
我 : 可唔可以俾我抱下BB呀?
Doris : 你小心D抱,佢成身都好柔軟架
Doris小心翼翼咁將BB交到我手上
好彩係我小時候,媽媽係幫親戚湊表妹賺錢,所以我都好熟手湊BB
BB好得意,合埋眼訓緊覺,雙手拳頭握緊左,好可愛
見到BB咁得意,乜野煩惱都即時忘記哂
我 : 有無打算改乜名未? 以後有乜野打算?
Doris : 暫時專心湊仔先,遲些再打算,名字就大家一齊想下啦
我 : 咁佢跟邊個姓?
Doris : 其實你係唔係想問個女係唔係你親生呀?
我 : 唔係,絕對無咁既意思,只係事情來得太突然,我一時唔知道俾乜野反應好?
Doris : 個女係你既,之前我同你分手後,我發覺自己有左BB
本來我想落左佢或者自己一個人生佢出黎自己養大佢,
但你始終係佢爸爸,你都要負番責任,
所以我先叫你黎醫院,但唔代表我想同番你一齊
我同Doris協定,以後我每晚照常返工,放工就去佢屋企一齊照顧BB
係我放假既日子就番自己屋企,唔可以係佢屋企過夜
或者我太過受傳統既觀念影響,有左BB當然係要結婚啦
宜家D女仔點解有咁既想法?我完全唸唔明
至於Suki方面,我覺得隱瞞落去都唔係辦法
所以我去接佢放工時打算同佢講清楚
Suki : 你今日唔係話好累,唔黎接我收工咩,你睇下你個樣
做乜近日個樣殘左咁多呀? (日日返工同湊仔,訓得兩個鐘到,唔死都已經偷笑)
我 : 我有D野想同妳講,但....
Suki : 一路行一路講啦 (Suki無時無刻都好清楚我想點,我真係唔想傷害佢)
我 : 仲記唔記得Doris呀?
Suki : 做乜無啦啦提起佢呀?
我 : 佢早幾日生左個BB
Suki : 你地仲有聯絡咩?
我 : 本來無架,係佢突然搵返我,個BB係我架....
Suki : 老公呀,你要生仔,我都可以同你生,有D野唔可以亂認架,
佢有無呃你架? 係唔係佢想搵個人認投炸?
我 : 如果計番10個月前,我的確係同佢一齊過...
Suki停低腳步,低頭左一陣
我即時攬住Suki : Suki,妳無事嗎? 對唔住呀
Suki卻推開了我,好大力咁打我一巴掌
Suki : 點解你要咁對我呀? 點解你地一個二個都要傷害我呀?
咁你宜家係唔係要返去個女人身邊同佢結婚呀?
此刻Suki已哭成淚人
我 : 唔係呀,我最愛既始終係妳,但妳俾D時間我,我處理完身邊既事,我就會返黎架啦
但Suki已沒有俾我再講落去,就衝上的士走了
[ = 續 = ]
