沉船的確可怕--下集大結局UPDATED!!
一年半前, 我仲係一個中產人士
今日, 我冇咗層樓, 冇咗架車, 冇埋老婆同小朋友, 留低嘅只有後悔同一大筆欠債
一年半前, 我嘅生活基本上係咁: 工作, 工作, 工作, 每朝八點半開始至夜晚十點, 我都不停工作, 由於係銷售行業, 多勞多得, 每個月平均收入都超過五萬, 加上老婆有份萬零蚊嘅穩定工作, 所以生活壓力唔大, 加上我哋平時又冇炒開股票, 最多都係買下外幣同埋基金, 所以金融海嘯對我哋都冇乜影響, 前年八月十一日, 雷曼倒閉嗰日, 我老婆睇醫生照倒有BB兩個月
當時我唔喺香港, 公司喺深圳有FUNCTION, 我收倒老婆電話嗰刻都幾開心, 因為知道自己有細路嘅時候, 人生又步入另一階段, 不過好快我就平伏心情, 繼續開會, 當晚約咗我一個朋友喺COCO PARK, 佢係我之前公司嘅上司, 而家係某銀行註大陸嘅高層, 食過飯後, 佢就帶我去酒吧, 飲飲下有兩個幾靚嘅女仔走過嚟撩我哋講嘢, 我都好禮貌咁請返佢哋飲嘢, 傾咗冇耐, 朋友就提議一齊宵夜
喺食宵夜嘅途中, 嚟咗一個好特別嘅女仔, 因為佢好似我大學時代暗戀嘅一位學姐, 佢係嗰兩個女仔嘅朋友, 初初以為佢得廿二,三歲, 後來先知佢都成廿七, 樣比實際年齡後生......朋友同我講, 食完嘢各自散, 睇中邊個帶返酒店就OK, 基本上我係從來冇返過大陸玩, 所以就好天真咁問佢: 乜咁就得架拿?
其實我當初都只係諗住大家食過飯, 最多交換電話就走人, 冇諗過要上床, 不過朋友一講就提醒咗我, 原來可以試試, 但係一試就出事喇......
朋友好識做咁同嗰兩個女仔講咗幾句, 嗰兩個女仔又同阿"學姐"講咗幾句, 之後"學姐"就同我一齊返酒店, 當時我心情好複雜, 坦白講, 我並唔係掛住老婆同BB, 而係唔知阿"學姐"係咪要收錢, 要又收幾多? 定係純粹一夜情? 不過算啦, 都返到酒店, 唯有見步行步
返到酒店, 搭LIFT上房, LIFT門一開, 迎面而來係一個怒漢, 佢左手執倚天劍, 右手揸屠龍刀, 我哋雙目對視, 就喺千份之一秒電光火石間, 我駛出我嘅謎踪步, 閃開怒漢嘅刀劍攻擊, 再踢出一腳神龍擺尾, 正中對方右邊睪丸, 奈何"學姐"原來係怒漢嘅同黨, 佢喺我頭上爆咗一個COCA-COLA樽, 我就頭破血流不支倒地, 醒返嘅時候, 聽到一把女聲, 原來係我老母叫我起身返工!
[ 本帖最後由 denny_chan 於 2010-1-31 01:32 AM 編輯 ]
