[按此打開]


大約係中學學期尾, 好耐之前既事, 我就開始係網上識女性朋友, 原因係身邊既女性朋友都好差, 可能太了解佢地, 佢地既性格唔適合我
身邊有幾個男友人都係網上識到女朋友, 佢地既戀情都keep到幾年, 條件又唔差, 可能係佢地好彩啦
而我條件都唔差, 有好多人追, 但全部都唔符合我既要求...所以搞到我都想係網上試下, 好似買六合彩咁, 唯有博一博
篇野都幾長下, 希望大家唔好介意睇埋落去..

1. 假相人
記得第一次係留言板識到個女仔, 睇相就覺得佢唔錯, 好似台灣女仔一樣, 果陣年少無知, 依家我地稱為"網戀"啦

咁個關係都keep左半年左右, 大家只係傾下電話, send sms, 玩msn等等, 但從來無正式見過面, 連玩cam都無...唔知對方係點既樣
但對方知道我係點既樣, 因為我平時都會send d生活照佢睇, 同埋有開過cam比佢睇 (依家諗返起都覺得自己好蠢好傻)
直至有一次我忍唔住想見佢真人, 約佢十次, 十次都甩我底, 到最尾我同佢講約佢最後一次, 佢唔出就算, 大家以後唔好再聯絡
因為實在太浪費時間, 我住香港果邊, 佢住新界, 當日我係佢住果區等左2個鐘, 佢都唔出現...大家就咁完結
但佢一直都keep住搵我, 我無理佢, 過左幾日, 我無意中發現佢另一個留言板, 就睇到相中人同初初睇佢send比我既相好大出入
睇果張相有95分, 日記果張相只有20分, 我睇完之後都呆左...比人呃左大半年...大半年都浪費緊時間...

2.傳銷女
第二次就係交友網站識, 本來就咁申請個會員就算, 無add過任何女仔, 但有個女仔主動add我, 收到佢既e-mail來信, 不過就唔靚既
大家傾左唔夠幾日, 佢講自己做義工, 又有內在咁, 外表其實唔緊要, 最重要係內在
後來佢主動約我去食飯, 睇戲...咁ok啦, 大家當日出到黎食完飯, 諗住去睇戲既時候...

佢就話佢留低左d野係公司, 叫我陪佢去佢公司, 咁岩又係附近, 咁我本來都係公司樓下等佢...佢就叫我上埋去
結果大家都知咩事啦, 又係傳銷果d野...我相信好多人都試過中招= =


3.半臉人
第三次就係日記到識左個女仔, 都係佢主動聯絡我先, 我睇返佢日記張相只得半邊臉, 初初當然會幻想佢點既樣啦...
因為睇落都覺得ok, 咁大家傾左2個月都幾岩傾, 之後叫佢send全臉既相比我又唔肯, 後來都打算放棄...都知道咩事
但佢咁岩話想約我出黎, 咁我就覺得哩次機會就當睇真下佢既全相, 男仔又唔會蝕底...
當日出到黎, 我真係嚇左一跳, 真係有好大既出入, 不過男仔應該要有風度, 我都盡力捱過成日

比著第2個一早搵藉口走左去, 咁我地睇完戲食完飯就各有各走...果日之後佢就一直有搵我...
一日成幾十個電話, 幾十個短訊, 我都有同佢表明過話只做到朋友...但佢話唔緊要, 仲話鐘意一個人唔一定要擁有..

咁我都無佢辦法..我只係唔想佢浪費時間而已...過左大半年佢都一直死纏難打...
最後搞到我完全唔理佢先收手...之後佢都有搵到第2個男朋友, 當時我以為我可以甩身...
點知佢同佢男朋友分左手之後又搵我...又話對我念念不忘...超級煩...搞到我要轉電話號碼先甩到身...好恐怖

4.美麗但古怪的人
第四次就係論壇到識左個女仔, 睇相都有90分, 而且佢都有開過cam我睇, 証明到佢真人, 但佢份人比較古怪一d
我同佢識左1個月左右, 就約左出黎, 發覺得佢係一個超級難溝通既人, 只有你問佢答...而且佢答每一句都係(哦...下...係呀...唔....)咁樣...
傾電話都還比較好, 但真人對話真係好困難..唔知係佢怕羞...還是咩啦...起初以為佢對陌生人先係咁...
最奇怪既係...我已經用盡好多話題同佢傾..佢都只答我哦...下...搞到我已經搵唔到話題再講落去...好悶...成日都只有我講....
再加上佢對"性"呢家野極度反感, 表明一世都唔會做...連結左婚都唔制, 咁樣我真係唔識點去同哩個人溝通落去...所以決定放棄...
但同上面半臉人一樣咁死纏難打...硬係要捉住我唔放手...搞到我又係完全唔理佢先肯收手...都幾可怕...原來外貌好一點既人都有唔好既一面

5.貼紙相
第五次都係論壇到識, 同以上都相隔左好耐時間, 同埋哩次都係最後一次, 咁因為工作繁忙關係, 公司又無女性朋友
而且生活圈子變得好細, 年紀開始隨時間流逝, 講真...咁耐以黎都未試過拍過一次拖, 好多朋友都覺得我拍過好多次拖...但其實一次都無
咁我就係論壇上識左一個女仔(邊個論壇唔講啦), 初初佢比張相我睇係幾張貼紙相, 睇落都ok, 可能加上閃光燈效果顯得佢更白
如是者傾左3個幾月, 都係佢主動約我出黎先, 咁約左係某個地方等, 咁我早到左, 就打比佢問佢著咩顏色衫同褲...
等左1個字左右...我前面有個唔錯既女仔好似等緊人...而且衫褲都一樣顏色...心諗應該係佢掛, 諗住行過去問佢之際...
佢打電話比我, 約我係另一個地方等...咁即係唔係佢啦, 之後到左果個地方, 我諗住哩埋先, 睇下佢係邊個...
如果唔對路我今次真係走, 唔想浪費時間, 但估唔到佢仲快過我, 佢一眼就認得出我係邊個...當時我見到佢既時候...

我吞左一淡口水, 心裡面講左一個oh my god, 真係完全估唔到佢真人咁樣......想走已經太遲, 走唔到
我同大家講下佢真人係點...皮膚黑過歷蘇...比救生員還要黑...真係唔好睇小貼紙相既威力

真係差過我所見過既女仔, 對比返張相...張相都有60分, 但真人連5分都無...(請原諒我直言, 是事實)
咁我都無辦法...佢已經第一時間捉住我隻手拉左我入餐廳食飯...d人既奇異目光我永遠都會記得...
食飯食左成半個鐘...d人就望足半個鐘...仲聽到好多人閒言閒語...真係有d頂唔順...
跟住去睇戲(戲票佢都一早買定左...) 其實係睇戲途中...好多人既目光都望住我地...我亦都知道發生咩事...

係睇戲途中睇到一半...我終於忍唔住出左去扮有電話入...當時其實我係想趁機會走左去...不了了之...
但做男人應該要有風度...我都死忍...不斷洗臉搞到自己清醒d, 然後再入返片場
睇完戲諗住可以鬆一口氣...諗住走人啦, 點知佢又捉住我隻手拉左我去睇展覽...又係比人用奇異目光望住...
足足成凌晨1點鐘先走得...但都未完結, 佢仲要求我送佢返屋企, 我話唔好, 因為好彩佢屋企係附近..好近..
之後佢又話送我去塔車....咁ok啦...因為我實在諗唔到有咩方法再拒絕佢...之後我一上到車佢又打黎...
跟住我扮話好累...一陣打比佢就收左線, 從此我就無搵過佢, 佢搵過我幾次之後都無再搵我...好好彩...

以上100%係真人真事, 唔係作故仔, 自從第5次之後我都無再係網上識任何女仔, 無論個女仔幾靚都好...
我都唔會再約出黎, 真係唔想浪費咁多時間, 與其花時間係網上識異性, 倒不如真真正正花時間係其他方面仲好...

經歷過5次坎坷網上戀情, 終於令我明白到愛情係唔可以強求, 無咪無囉, 唔一定要擁有愛情
我以前就係覺得點解我既朋友差過我咁多都有女朋友...點解我無呢...搞到我太心急先搵女朋友
如今我已經看透左, 所以奉勸大家網上識異性時要小心, 我相信大家都會經歷過我上述既經歷
雖然有部份係好彩..有部份好似我咁唔好彩...但始終網上識異性係非常之唔安全...

真係寧願係街上識一個人, 都唔好係網上識...唔理大家既批評係點...我都預左有唔好既批評
你地可能會話我以貌取人, 我會答你係, 人係犯賤既, 但最重要既都係感覺, 第一眼既感覺都無...仲點樣繼續落去?