股市崩盤 鳳姐生意慘淡
:smile_39: :smile_39: :smile_39:
「人人輸身家 哪來錢買我？」
2008年11月23日
[報專訊】金融海嘯影響可謂無孔不入，上至美國國運以致全球局勢、下至10元雲吞麵銷量，都跟金融海嘯扯上或多或少的關係。香港人口近700萬人，億萬富豪、街邊擦鞋佬、教會牧師……每對眼睛看到的海嘯「災情」都不一樣。
本報記者走訪社會上不同階層的人物，聽聽他們在海嘯中的故事，或親身經歷、或冷眼旁觀，嘗試捕捉海嘯下的社會真貌。
海嘯浮世繪系列一
姓名：Icey(化名)
年齡：報稱24(實際應逾30歲)
職業：深水埗「樓上骨」(即鳳姐)
1997年的金融風暴，2003年的SARS，2008年的金融海嘯，把香港經濟打沉再打沉，失業率升至高峰，年輕的Icey，雖然未必無選擇，卻悄悄換上火辣透視裝，背着家人跳下茫茫黃業大海，一蕩十年。
那個閣樓，真愛從未叩門，但炒股風盛時卻有尋歡客探問﹕「幫你做個財務分析如何？」不過金融海嘯一到，股市又崩盤，歡場又冷落，輸清身家的嫖客，或按鐘訴苦，或霸王硬嫖……那日下午，Icey躲在橘紅色的鳳閣內，說上岸，卻不知何處是岸，嘆浮沉，卻不願一世浮沉。她的迷惘，也就是諸鳳的迷惘。
年初每日8個客 現剩2個客
「97年原本做Sales，金融風暴被炒，無嘢撈，98年出嚟做到今日。哥仔，我有屋企人要養，但唔可以畀佢哋知，嗰時真係好差。」差過現在？「其實今年年頭原本幾好，一日好易做到8個客，點知9月突然唔見晒，每日得番2個左右。呢度200幾呎地方月租成4000，要買衫、交水電，賣報紙鹹網廣告，每月開支要成萬，一日做唔夠3個就要蝕，我以前收350，𠵱家逼住收300。」
有否問嫖客何解不找你？「我點敢問，明知股票唔掂，個個都輸錢，問嚟咪盞唔開心，何苦啫。呢幾年個個都上網，服務得唔好，講錯嘢，就上網寫衰你，我服務得好就有貼士，一般都50蚊，過百都試過，𠵱家經濟差就無晒。好現實，佢哋𠵱家連10蚊都叫我找！有熟客老實同我講，真係無乜錢，畀唔出手。以前無錢出嚟做，𠵱家做都無錢。做我哋呢行賣身嘅，人哋無錢，搵乜嚟買我？」
「唔少人就係唔開心，有的同屋企人嘈，有的畀老闆炒，有人畀錢淨係攬住你傾偈，話好唔開心，我話『唔好咁啦，個市好快會好，好快搵番的錢㗎啦』，然後同佢揼骨。但心諗，邊有咁容易好番吖……」
「我哋賣身嘅，有時都會諗幾時搵個男人，(嫖客)邊行都有，銀行、做生意，但點會有男人真心？有啲客好好人，我都會諗﹕如果係我男人都幾好，但人哋一係有家室，一係份工唔掂，自己都顧唔到。唉，我日日匿係度，晏晝12點等客等到凌晨2點，點會有希望？」
料明年更差 轉行恐無人請
明年點？「聖誕我哋先最慘，人哋個個一家團聚，男人全部返屋企陪老婆仔女，又要儲錢買禮物畀女朋友，邊有錢同時間搵我哋？生意最差㗎啦……家吓啱啱先開始衰，明年應該仲差過以前，隔離左右姊妹都無生意，仲係咁，我打算出番去搵嘢做，Sales呀嗰啲，但都唔知到時有無人請我……」
言談間，又有客到，高大後生。「你再喺度，淨係問，我點做生意？」後生仔閃入鳳閣，閣門慢慢關上，隔鄰的姊妹聞聲開門偷看，但走廊樓梯已空盪無人。
